Дьокуускай куорат 2 №-дээх полициятыгар 57 саастаах дьахтартан төлөпүөннээх уонна баан карталаах суумкатын уордарбытын туһунан үҥсүү киирбит.
Кини бэйэтэ быһаарбытынан, кылааһынньыктарын кытта куорат таһыгар оскуоланы бүтэрбитэ 40 сылын бэлиэтээбиттэр. Сарсыарда 5 чаас саҕана бүтэн сакаастаабыт оптуобустарынан төннүбүттэр. Айаннаан иһэн дьахтар кылааһынньыктарын кытта кыыһырсыбыт уонна оптуобус вокзалын аттыгар тахсыбыт. Мээнэ баран иһэн, ким эрэ анньыбытыттан дуу, бэйэтэ тэмтэрийэн дуу, охтон түспүт. Уһуктубута хайа эрэ иһирик быыһыгар сытар, төлөпүөннээх уонна маллаах суумката суох эбит. Онон дьахтар тута чугастааҕы бааҥҥа ыстаммыт. Тиийэн билбитэ, кини харчытынан ким эрэ 244 000 тыһ. солк. сууммалааҕы атыыласпыт.
Холуобунай ирдэбил үлэһиттэрэ дьахтары халааһыҥҥа уорбаланааччыны, урут сууттана сылдьыбыт 21 саастаах эр киһини туттулар. Кини кэпсээнинэн, сарсыарда 6 чаас саҕана сиртэн суумка булан ылбыт уонна төлөпүөнү кытта көмүс киэргэллэри хостообут. Төлөпүөн күлүүһүн алдьатан баран баан сыһыарытын арыйбыт уонна дьахтар счетугар улахан сууммалаах харчы баарын көрбүт. Банкомакка тиийэн уһулаары гыммыта сатамматах. Онуоха, эр киһи бэйэтигэр iPhone атыыласпыт, эрэстэрээҥҥэ аһаабыт, таҥас атыыласпыт, көмүс киэргэллэри ломбарга туттарбыт. Быһата, биир күн ыраланар олоҕунан олорбут.
Уоруйахха холуобунай дьыала тэрилиннэ, оттон дьахтарга бу быһылаан улахан үөрэх буолла.
Сонун төрдө: СӨ ИДьМ
