Дьалхааннаах байыаннай дьайыы хас биирдии ыал олоҕун хаарыйар, долгутар. Маныаха Амма улууһугар Римма Васильевна Алексеева салайааччылаах "Амарах сүрэх" уопсастыбаннай хамсааһын биһиги хорсун байыастарбытыгар анаан араас өрүттээх көмө-тирэх буолар үлэни күннэри-түүннэри тохтоло суох ыытар.
Ол курдук, биир дойдулаахтар байыастар көрдөһүүлэригэр хардаран бу күннэргэ 259 000 солкуобайы уонна 284 000 солкуобайы «Маvic-3” диэн икки көтөр дрон аппараты ыларга, ону сэргэ массыына атыылаһалларыгар 100 000 солк көмө харчыны түмэн ыыттылар. Бу курдук Римма Васильевна уолаттарга көмө ирдэнэрин туһунан ыҥырыы таһаарда да, дьон-сэргэ олус түргэнник хардарар, баҕа өттүлэринэн көхтөөхтүк кыттан сөптөөх үп-харчы түмүллэ охсор.
"Амарах сүрэх" хамсааһыҥҥа биир улахан төһүү күүһүнэн Амма урбаанньыттара буолаллар. Кинилэр кууһунан өлгөмнүк оҥорор көмөлөрүн куруук махталынан ахтабыт. Бу көтөр аппарааттар уонна тимир көлө уолаттарбытыгар туһалыахтара, кыайыыны чугаһатыахтара диэн эрэнэ саныыбыт.
"Амарах сүрэх" хамсааһын ,"Күндүл" Амма эдэр ыччатын түмсүүтүн, Амматтан төрүттээх араас улууска, Дьокуускай куоракка олорор биир дойдулаахтарбытын эмиэ бэйэтин тула түмэр. Ким төһө кыахтааҕынан кыайыы чугаһыырын, анал дьайыыга сылдьар байыастарбыт олохторо хайдах эмэ чэпчиирин туһугар бэйэлэрин көмөлөрүн ыыта олороллор.
Маннык амарах сүрэх, амарах санаа күчүмэҕэйи күөйдүн, кыһалҕаны кыайдын диэн баҕалаах Амма "Амарах сүрэх" хамсааһына күннэри-түүннэри үлэтэ тигиниир: саһыарар сеткалары баайан, аптечкаттан, окуопа чүмэчититтэн саҕалаан сылаас таҥаһыгар, дойдуларын иҥэмтэлээх этигэр, арыытыгар тиийэ гуманитарнай көмө араас көрүҥүн астаан, хомуйан ыыта олороллор.
Сонун төрдө: "Амарах сүрэх" уопсастыбаннай хамсааһын
