Арассыыйа Дьоруойа, аатырбыт «Алеша» тааҥка оператор-наводчига Алексей Неустроев РФ Бырабыыталыстыбатын иһинэн Үп-харчы университетын устудьуона буолла.
Балаҕан ыйын 2 күнүгэр Кириэмил дыбарыаһыгар устудьуон аатын ылыы үөрүүлээх тэрээһинэ ыытылынна. Ректор Станислав Прокофьев АБДь кыттыылаахтарыгар махтанна уонна Алексейы киэн тутта бэлиэтээтэ.
Бэс ыйыгар Алексей Неустроев хамандыырын, Арассыыйа Дьоруойа Александр Леваковтуун бу университекка киирэ сылдьыбыттар. Биир дойдулаахпыт Экэниэмикэ уонна урбаан факультет «Управление бизнесом» салаатыгар үөрэнэргэ быһаарыммыт.
Маны сэргэ, «Алеша» тааҥка өссө биир кыттыылааҕа Филипп Евсеев ХИФУ физкултуура уонна успуорт институтугар үөрэнэ киирбитэ билиннэ.
Сонун төрдө: Улус-Медиа
