Дьокуускайга балаҕан ыйын 2 күнүгэр анал байыаннай дьайыы кыттыылаахтарын кэргэннэрин уонна ийэлэрин хаартыскаларын быыстапката Юрий Гагарин аатынан Култуура уонна ускуустуба киинигэр аһылынна. Тэрээһиҥҥэ киин куорат баһылыга Евгений Григорьев кытынна.
Маннык патриоттуу аахсыйа аан бастаан Самараҕа киин байыаннай уокурук 2-с гвардейскай аармыйатын командующайын кэргэнэ Екатерина Колотовкина толкуйунан «Жены Героев» диэн аатынан ыытыллыбыта уонна дойду үрдүнэн киэҥник тарҕаммыта. Оттон Дьокуускайдааҕы бырайыак тэрийээччитинэн АБДь кыттыылааҕын ийэтэ Наталья Швецова буолар. Кини саҕалааһынын Дьокуускай куорат уокуруктааҕы дьаһалтата өйөөтө.
Быыстапкаҕа АБДь кыттыылаахтарын кэргэннэрэ уонна ийэлэрэ байыаннай таҥастаах хаартыскаҕа түстүлэр. Ону кытта суруктартан быһа тардыылары ыйаатылар. Барыта 23 дьахтар сөбүлэҥ биэрэн кытынна.
Наталья Швецова этэринэн, манныкка кыттар судургута суох. Онон, тэрийээччи кинилэр күүстээх санааларыгар сүгүрүйэр. Быыстапка элбэх киһи сүрэҕин долгутар, хараҕын уутун аҕалар чинчилээх.
Сонун төрдө: Дьокуускай куорат уокуруктааҕы дьаһалтата
