Дьокуускай куорат Дууматын уочараттаах VIII сиэссийэтигэр дьокутааттар СӨ Административнай кэһиилэр туһунан Кодексыгар уларытыыны киллэрэр туһунан этиини өйөөтүлэр. Уларытыы куорат иһинээҕи уонна таһынааҕы оптуобустарга төлөөбөккө тахсар дьону эппиэтинэскэ тардыыга сыһыаннаах.
Бу боппуруоска «Куорат суолга уонна тырааныспарга сулууспата» МХУ салайааччыта Эдуард Садовников тыл эттэ. Кини сыл ахсын оптуобуһунан айанныыр дьон ахсаана элбээн иһэрин бэлиэтээтэ. Ол курдук, былырыын 40 мөл. пассажиры тиэйбит буоллахтарына, иллэрээ сыл 6 мөл. кэриҥинэн аҕыйах эбит. Маныаха, салайааччы этэринэн, оптуобустан төлөөбөккө тахсыы, онтон сылтаан мөккүһүү ахсаана эмиэ элбээбит. Онон, дьокутааттар бу этиини эбэн-сабан, көннөрөн баран ылынар санаалаахтар.
Оттон эһиги туох санаалааххыт? Биирдэ эмэ оптуобустан төлөөбөккө тахса сатыыр киһини көрбүккүт дуо?
Сонун төрдө: Дьокуускай куорат уокуруктааҕы дьаһалтата
