Балаҕан ыйын 5 күнүгэр түүн 23 чаас 35 мүнүүтэҕэ баһаарынай сулууспаҕа Хабаров уулуссатын 56-гар икки этээстээх мас дьиэ умайа турарын туһунан иһитиннэрии киирбит. Бастакы бөлөх тиийиитигэр уот дьиэ үрдүгэр тахсыбыт, иккис подъезка 200 кв. миэтирэни сии охсубут. Баһаарга үс киһи умайбытыттан иккитэ өрүттүбэтэх. Үһүс киһи ыарахан туруктаах сытар. Силиэстийэ барар турар.
Бырамыысыланнай уокурук быраабатын салайааччыта Семен Иванов иһитиннэрбитинэн, бу дьиэ 1978 тутуллубут, 2012 сыллаахха хаарбах дьиэ быһыытынан бигэргэммит. Мантан олохтоохтору эрдэ маневреннай дьиэлэргэ көһөртөөбүттэр эрээри, үс киһи батынан олоро хаалбыт курдуктар. Дьиэ-уот сыһыаннаһыыларын департаменын салайааччыта Евгения Пак эппитинэн, олоро хаалбыт үс кыбартыыра хаһаайыннарыгар сотору кэминэн саҥа дьиэ күлүүстэрин туттарыахтаахтар эбит.
Быһылаан кэнниттэн Дьокуускай куорат уокуруктааҕы дьаһалтатыгар тэриллибит суһал мунньахха баһылык солбуйааччыта Егор Кардашевскай баһаары сэрэтэр тэрээһиннэри, элбэх оҕолоох уонна кыра дохуоттаах дьиэ кэргэннэргэ АДПИ туруоруутун күүһүрдэргэ чопчу сорудахтары биэрдэ.
Сонун төрдө: Дьокуускай к. уокуруктааҕы дьаһалтата
