Бүгүн Дьокуускайга Бүтүн Арассыыйатааҕы эдэр финансистар бастакы пуорумнара саҕаланна. Манна дойду 24 эрэгийиэниттэн, ол иһигэр ДНР, Запорожье уобалаһыттан уонна Крым өрөспүүбүлүкэтиттэн, бу эйгэҕэ үлэлиир исписэлиистэр муһуннулар.
Пуорум аһыллыыта Бырабыыталыстыба дьиэтигэр буолла. Кыттааччылары Бэрэссэдээтэл Кирилл Бычков эҕэрдэлээтэ. Кини уустук экэниэмикэлээх, сааҥсыйалаах кэмҥэ финансистар ураты суолталаахтарын, экэниэмикэ туруктаах буолуутун кинилэр хааччыйалларын ыйда, онон билиини-көрүүнү хаҥатыы, уопут атастаһыы, саҥаны киллэрии олус туһалааҕын тоһоҕолоото
Пуорум үөрүүлээх чааһыгар «ДЬоруойдар кэмнэрэ» тосхол кыттыылааҕа, Арассыыйа Дьоруойа Игорь Юргин, РФ Судаарыстыбаннай Дууматын экэниэмикэ бэлиитикэтин кэмитиэтин бэрэссэдээтэлин солбуйааччы Артем Кирьянов уонна СӨ үпкэ-харчы миниистирин э.т. Иван Алексеев тыл эттилэр.
Ыҥырыылаах эспиэрдэр ортолоругар РФ Уһук Илини уонна Арктиканы сайыннарыыга миниистирин бастакы солбуйааччыта Гаджимагомед Гусейнов, Арассыыйа Баанын бэрэссэдээтэлин солбуйааччыта-статс-сэкирэтээрэ Алексей Гузнов, ону сэргэ РФ үпкэ-харчыга министиэристибэтин билим-чинчийии институтун, РФ Бырабыыталыстыбатын иһинэн университетын, ВТБ, СБЕР, Газпромбанк, Альфа-банк, Промсвязьбанк, АТБ уонна АЭБ бааннар сүрүннүүр үлэһиттэрэ бааллар.
Пуорум иитинэн, эспиэрдэр кыттыылаах дискуссиялар, дьыалабыай оонньуулар уонна успуорт тэрээһиннэрэ ыытыллыахтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Мария Васильева, ЯСИА
