Балаҕан ыйын 15 күнүгэр, өрөбүлгэ, НТВ тэлэбиидэнньэ ханаалыгар «Ты супер!» шоу ахсыс сезонун үһүс биэриитэ буолуоҕа. Манна Саха сириттэн Дьокуускай олохтооҕо 12 саастаах Ева Тихонова кыттыаҕа.
Ева, күн сирин көрөөт, Кыра оҕо дьиэтигэр түбэспит: төрөппүт ийэтэ, ыараханнык ыалдьан оҕотун кыайан көрбөтөх, онтон сотору кэминэн суох буолбут. Кыысчааны үс аҥаар саастааҕар дьиэ кэргэҥҥэ иитэ ылбыттар. Онон, кини ийэ кыһамньытын уонна тапталын билэн улааппыта.
Ева алта сааһыттан вокалынан дьарыктанар. Билигин Дьокуускай к. 1 №-дээх Оҕо ускуустубатын оскуолатын эстрада салаатыгар үөрэнэр. Олус үөрүнньэҥ, дьээбэлээх уонна талааннаах. Кыратыттан тугу барытын сэҥээрэр, үөрэҕи уонна саҥаны дэбигис ылынар, ииһи-ууһу дьарык гынар (оригами, оҕуруону тиһии, тигии, баайыы, макраме), үчүгэйдик хаҥкылыыр уонна харбыыр.
Кыысчаан Полина Гагаринаны кытта билсэр уонна дуэтынан «Ангелы в танце» ырыаны ыллыыр, дьиэ кэргэнин кытта саҥа тупсаҕай дьиэҕэ олорор уонна биллиилээх ырыаһыт буолар ыра санаалаах.
Сонун төрдө: https://yakutia24.ru
