«Орто Салаа» эко паарка бырайыага Бүтүн Арассыыйатааҕы табыгастаах куорат эйгэтин бастыҥ бырайыагын талар күрэс икки түһүмэҕэр кыайыылаах тахсан олоххо киирдэ. Ааптара — «База 14» тэрилтэ.
Паарка бырайыагар, бастатан туран, Алдан көмүс хостуур бырамыысалыннаһын уонна айылҕатын көрдөрбүттэрэ. Онон, манна оонньуур, успуордунан дьарыктанар уонна дьаарбайар сирдэри, муосталары, ыскаамыйалары уонна уотунан сырдатыыны барытын биир истиилинэн оҥорбуттара.
Быйыл пааркаҕа киирэр сир, бэсиэккэ, быанан хаамар сир, памп-трек, фотозона, ыты дьэгдьитэр былаһаакка, тактильнай уонна эко ыллыктары тутаннар, силигэ ситэн турар. Манна эбии ыскаамыйалары туруордулар, массыына уурар, бөх быраҕар уонна чэпчэтинэр сирдэри оҥордулар. Пааркаҕа дьон тоҕуоруһар сүрүн уораҕайынан сцена уонна амфитеатр буоллулар. Манна хайыы сахха кэнсиэрдэр уонна да атын тэрээһиннэр буолан аастылар.
Бырайыагы күрэскэ бэлэмнииргэ Саха сирин Ил Дарханын Архитектура уонна куораты тутуу управлениета, куорат эйгэтин тэрийиигэ LETO сатабыл киинэ көмөлөстүлэр.
Сонун төрдө: Куорат эйгэтин тэрийиигэ LETO сатабыл киинэ
