Бэҕэһээ, балаҕан ыйын 11 күнүгэр, Москуба куоракка КВН оонньууну төрүттээбит, салайбыт биллиилээх ыытааччы Александр Масляковы тиһэх суолугар атаардылар. Кини 83 сааһыгар сылдьан балаҕан ыйын 8 күнүгэр ыарахан ыарыыттан олохтон туораата.
Норуот тапталын ылбыт чулуу киһини кытта бырастыылаһыы «Планета КВН» ыччат киинин кэнсиэртиир саалатыгар буолла. Киин тас эркинигэр Александр Масляков мэтириэтин ыйаатылар. Александр Николаевич туһунан элбэх үтүө тыл этилиннэ. Кинини кытта 57 сыл устата доҕордоспут ыытааччы Леонид Якубович улаханнык уйадыйан туран олус истиҥ тыллары анаата. Бастакы ханаал салайааччыта Константин Эрнст Сэбиэскэй Сойуус космонавтиката Гагарин мичээринэн биллэр буоллаҕына, тэлэбиидэнньэтэ Масляков мичээринэн биллэрин бэлиэтээтэ.
Оттон таһырдьа мустан турбут дьон артыыһы 10 мүнүүтэни быһа ытыс тыаһынан доҕуһуоллаан атаардылар. Арассыыйаҕа көр-күлүү жаанырын киэҥ араҥаҕа таһаарбыт, сайыннарбыт ускуустуба үтүөлээх диэйэтэлин Новодевичэй кылабыыһаҕа диктор Игорь Кириллов уонна артыыс Элина Быстрицкая аттыгар кистээтилэр.
Киин ситимнэр таһаарыыларынан бэйэ кэр.
