Соторутааҕыта социальнай ситимнэринэн куорат киинигэр араастаан айаннаан дьаабыланар массыыналары уһулбуттарын тарҕаппыттара. Ол чахчытынан, полиция үлэһиттэрэ 25 уонна 27 саастаах эрэттэри туттулар. Дьон олоҕор кутталлаах быһыыны-майгыны үөскэтэр оройдорунан көрбүт бэдиктэргэ холуобунай дьыала тэрилиннэ.
Кэнники биллибитинэн Toyota Altezzа суоппара суол быраабылатын кэһэн, сүрүннээн түргэни үрдэтии иһин, 18 төгүл эппиэтинэскэ тардылла сылдьыбыт. Кинини кытары оперативниктар Toyota Сaldina уонна Nissan Laurel массыына суоппардарын туттулар. Бэрэбиэркэ түмүгүнэн, 27 саастаах "калдина" суоппара 1,5 сыл иһигэр суол быраабылатын 114 төгүл кэспитэ биллибит. Кини массыыната «хаҥкылыырын» олорсо сылдьыбыт автодорожнай факультет 2 кууруһун 25 саастаах устудьуона уһулбут. Оттон 25 саастаах "лаурель" суоппара ханна да үөрэммэтэ, үлэлээбэтэ биллибит.
Маннык дьон олоҕор кутталы үөскэтэр нүдьү-балай бэдиктэр өйдөнөллөрүн туһугар кинилэргэ туох миэрэни ылыахха сөбүй?
Сонун төрдө: ИДьМ пресс-сулууспата
