Таатта Харбалааҕар Улуу Кыайыы 80 сыллаах үбүлүөйүн көрсө бэлэмнэнии саҕаланна. "Дьоһуннааҕы кэпсэтии" чаастарыгар Улуу Кыайыы, дойдуга бэриниилээх буолуу туһунан кэпсэтиилэр, иһитиннэрэр-биллэрэр дьарыктар тиһигин быспакка ыытыллар былааннара оҥоһулунна.
Бүгүн нэһилиэккэ Кыайыы болуоссатын күрүөтүн кырааскалааһыҥҥа субуотунньук биллэриллибитэ. Онно кылаас салайааччылара Татьяна Прокопьевна Слепцова, Кэрэчээнэ Егоровна Терентьева, иитэр үлэни тэрийээччи Варианна Васильевна Макарова салалталарынан 9-10 кылаас үөрэнээччилэрэ ис сүрэхтэн кыһаллан туран үлэлээтилэр.
Бу болуоссаты, "Ытык сирдэр" бырайыак иитинэн, 9 кылаастар сылын аайы сыһыарыллан көрөллөр-истэллэр, ыраастыыллар.
Нэһилиэк ППМИ бырайыагар кыайан, болуоссаты саҥардыыга үлэ бара турар. Онон ытык дьоммутугар сүгүрүйэр болуоссаппыт Кыайыы 80 сылын көрсө сэргэхсийиэ, баай ис хоһооннонуо диэн эрэнэ күүтэбит!
8 кылаас үөрэнээччитэ Лейла Никонова, учуутала В.С. Кривошапкина. Таатта, Харбалаах.