Дьокуускай к. IT-пааркатыгар Оҥоһуу өй (Искусственнай интеллект) лабораториятын арыйдылар. Манна туттуллар технологиялары доруобуйа харыстабылыттан саҕалаан ойуур баһаарын бохсууга тиийэ туһаныахтара.
Лабораторияны СӨ Бырабыыталыстыбатын, М.К.Аммосов аатынан ХИФУ уонна СБЕР былырыын сэтинньигэ илии баттаспыт үс өрүттээх меморандумнарынан бигэргэммит кыттыгас бырайыак иитинэн тэрийдилэр. Санатар буоллахха, маннык толкуй Арассыыйа Сбербаанын бырабылыанньатын бэрэссэдээтэлэ Герман Греф уонна Ил Дархан Айсен Николаев кэпсэтиилэриттэн үөскээбитэ.
Лабораторияҕа 3 технологическай партнертан 4 бырайыактыыр хамаанда үлэлээн саҕалаата. Манна 26 исписэлиис кыттыста. Оҥоһуу өйү, чуолаан виртуальнай ассистены, доруобуйа харыстабылыгар туһаныахтара. Ойуур баһаарын бохсууга билгэлиир ньыманы тобулуохтара. Ону сэргэ, элэктириэн докумуоннары эргитиигэ уонна төрөөбүт тыллары сайыннарыыга саҥа ньымалары киллэриэхтэрэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
