Дьокуускай куорат «Арчы дьиэтигэр» сылдьыбыт эрэ киһи манна кыһынын тымныы, сайынын итии буоларын бэлиэтиир. Духуобунай култуура киинэ 2002 сылтан биирдэ даҕаны олохтоохтук өрөмүөннэнэ илик эбит. Ол туһунан дириэктэр Лариса Андреева киин куорат баһылыга Евгений Григорьев өрөмүөн хаамыытын көрө сырыттаҕына иһитиннэрдэ. Хата, быйыл дьон сөбүлээн мустар сирин дьоһууннаахтык саҥардан оҥоро сылдьаллар.
Бэдирээччит «Капитал-М» ХЭТ (генеральнай дириэктэр Ильин В.И) иһитиннэрбитинэн, өрөмүөн үлэтэ от ыйыгар саҕаламмыт. Күн бүгүн былааннаммыт үлэ, ол иһигэр дьиэ эркинин саҥаттан бүрүйүү, куполлары таҥыы, 80% туолан турар. Маны сэргэ, «Олоҥхо», «Эйгэ», «Арчы» саалалара, аччыгый сиэр-туом хоһо өрөмүөннэннилэр. Ол курдук, итилэргэ мас муостаны бүтүннүү керамограникка уларыттылар. Өрөмүөн холл вестибюлүгэр, бибилэтиэкэҕэ, үлэлиир кэбиниэттэргэ уонна атын үлэ хосторугар эмиэ ыытылынна. Ону таһынан, бэдирээччит саҥа киирэр аарканы уонна тиэргэни саҥардан оҥордо.
Маннык тэтиминэн өрөмүөн үлэтэ сэтинньи 1 күнүгэр түмүктэниэхтээх. Ол кэннэ Дьокуускай олохтоохторо уонна ыалдьыттара Арчы дьиэтин тэрээһиннэригэр урукку курдук үөрэ-көтө кэлиэхтэрэ, кыттыахтара.
Сонун төрдө: Дьокуускай к. уокуруктааҕы дьаһалтата
