Киин куоракка аҕам саастаахтар ахсааннара сыл ахсын элбээн иһэр. Онон, кэлэр сылга Ил Дархан дьаһалынан Аҕам саастаахтар көхтөөх сынньалаҥнарын киинин тутуу былааннанар. Ол туһунан баһылык Евгений Григорьев Аан дойдутааҕы аҕам саастаахтар күннэрин бэлиэтиир үөрүүлээх тэрээһиҥҥэ биллэрдэ.
Кини дьиэ кэргэн сыаннастарын харыстабылыгар үтүөлэрин иһин Махтал суруктары Хатаска олорор Кузьминнарга уонна Мархаҕа олорор Козиннарга туттарда. Кинилэр ыал буолан уһуннук олоруулара ыраас тапталы уонна бэриниилээх буолууну кэрэһэлиир.
Ол курдук, Кузьминнар сүрэхтэрин холбообуттара 52 сыл буолбут. Кинилэр үс оҕону төрөтөн улаатыннарбыттар. Улахан уоллара Василий – анал байыаннай дьайыы кыттыылааҕа, Эр санаа уордьанынан наҕараадаламмыт. Оттон Козиннар ыал буолбуттара 60 сылын бэлиэтииллэр. Альберт Михайлович – ССРС бочуоттаах радиһа. Маргарита Николаевна өр сылларга телефонистканан үлэлээбит.
Сонун төрдө: Дьокуускай к. уокуруктааҕы дьаһалтата
