Алтынньы 1 күнүгэр Дьокуускайга Н.Г. Чернышевскай аатынан Бүлүүтээҕи профессиональнай-педагогическай колледж эбии салааларын Анаабыр национальнай уонна Ленскэй оройуоннарыгар арыйар үөрүүлээх тэрээһин буолан ааста.
Идэҕэ эрдэттэн бэлэмниир кииҥҥэ (Центр опережающей профессиональной подготовки) колледж уонна улуус дьаһалталарын бэрэстэбиитэллэрэ бииргэ үлэлиир туһунан сөбүлэһиигэ илии баттаатылар. Онон, саҥа үөрэх дьылыгар Ленскэйдээҕи технологическэй техникум базатыгар алын сүһүөх учууталларын бэлэмниир салаа аһылынна. Манна хайыы сахха 15 устудьуон үөрэнэ сылдьар. Оттон Анаабыр оройуонугар Сааскылаах орто оскуолатын базатыгар оскуола иннинээҕи педагогтары бэлэмниир салаа аһылынна. Манна 10 устудьуон үөрэнэ сылдьар.
Ити курдук оройуон олохтоохторо таһымнаах үөрэҕи ырааппакка ылар кыахтаннылар. Устудьуоннары колледж преподавателлэрэ уонна олохтоох педагогтар үөрэтиэхтэрэ. Кэлэр сылга маннык салаалары Булун уонна Мииринэй улуустарыгар арыйыыны былаанныыллар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
