Балаҕан ыйын 30 күнүгэр хаһыаппыт эрэдээксийэтигэр 2024 с. иккис аҥаарыгар “Кыымы” суруппут дьон ортотугар сүүйүүлээх сурутууну оонньотуу уочараттаах тэрээһинэ буолан ааста.
Биллэрин курдук, билигин “Кыым” хаһыаты өрөспүүбүлүкэбитигэр барыта 9 тыһ. чугаһыыр киһи сурутар. Бу сырыыга барыта 32 бириис оонньонно. Сүрүн успуонсардар: “Турбери” тур-хампаанньа, “Кухняшкаф” миэбэл ательета, “Ичигэс унтуу”, “Хотугу таҥас”, “Пулбир”, “Оптимист”, “Уран саха”, “Байанай”, “Айар” уо.д.а.
Мэлдьи да буоларын курдук, сүүйүүлэр Сахабыт сирин араас улуустарынан эриэ-дэхситик тарҕаннылар.
Сүрүн бириистэр, “Турбери” хампаанньа туруорбут, Турция Антальятын кытылыгар баар куораттарга 8 күн устата сынньанар, күүлэйдиир 64 тыһ. солк. сыаналаах 2 путевката Бүлүү куоратыгар уонна Орто Халыма Эбээҕэр барар буоллулар. Бу путевкалары сүүйбүт дьон “Турбери” хампаанньаны кытта сибээстэһэн хаһан, хайдах айанныылларын быһаарыныахтара.
Орто Халыма Эбээҕин олохтооҕо Наталья Винокурованы кытта сибээстэһэ сырыттыбыт:
– 64 саастаахпын, икки уоллаахпын, икки сиэннээхпин. Эбээх төрүт олохтооҕобун. Бэйэм урут атыы-эргиэн тиһигэр үлэлээбитим. Билигин оҕолорбун кытта бөһүөлэкпитигэр кыракый бэкээринэ сыыһын арыйан үлэлэтэбит.
“Кыымы” уруккуттан сурутабын. Ону сэргэ, улууспут “Халыма долгуннара” хаһыатын... Арай, почталар сүгүн тиэрдибэккэ эрэйдииллэр. Холобур, бу сайын устата хаһыат диэни көрбөккө олоробут. Аҕалбаттар. Кыһыҥҥы өттүгэр, суол баар буолан, син кэмигэр кэлэр.
Хаһыаккытын барытын ааҕабын, үчүгэй баҕайы.
“Турцияҕа баран сынньанар путевканы сүүйбүккүн” диэн бэҕэһээ Дьокуускайтан быраатым тиэрдибитэ. Үөрэн бөҕө буоллаҕа, хайдах үөрүөм суоҕай!
Бүлүү куоратын олохтооҕо, 85 саастаах Наталья Константиновна Константинова маннык диир:
– “Кыымы” суруппутум ыраатта, 2025 с. бастакы аҥаарыгар эмиэ булгуччу сурутаары олоробун. Икки кыыстаахпын, иккиэн ыаллар. Бу кыра кыыспын кытта олоробун. Хаһыат кэллэҕинэ иккиэн ааҕабыт.
“Кыымҥа” суруллубуту барытын сэргээн-сэҥээрэн ааҕабыт. Абааһы буоллун, АБДь буоллун, таптал буоллун... Кыыһым тыа хаһаайыстыбатыгар үлэлиир, онон хаһыаттан ааҕан үлэтигэр туһалааҕы элбэҕи булар. Тус бэйэм хаһыаты баһыттан атаҕар диэри тугун да ордорбокко ааҕабын. Дьиэбэр олорон сыта-тура, нэдиэлэни быһа ааҕан бүтэрэбин. Сороҕор иккистээн төхтүрүйэн ааҕабын.
Лотереяҕа оонньоон бэйэм хаһан да сүүйбэтэх киһибин. “Кыым” хаһыаты суруппутум быданнаата да, наар атын дьон сүүйбүтүн булан ааҕабын. Ол, ардыгар, абалаах курдук буолар.
Урукку дьыалларга “Ситим” таһаарар “Күрүлгэнин” эҥин барытын сурутарым. Билигин сороҕор киоскаттан атыылаһан ааҕабын.
«Кыым» 2024 сыл иккис аҥаарыгар сүүйүүлээх сурутуу боротокуола:
