Алтынньы 5 күнүгэр Горнай улууһун Атамай нэһилиэгэр Учуутал күнүгэр түбэһиннэрэн саҥа таас оскуоланы арыйдылар. Олохтоохтору Ил Дархан Айсен Николаев эҕэрдэлии тиийдэ. Кини үлэһиттэргэ уонна оҕолорго анаан саҥа оптуобус күлүүһүн туттарда.
Бу 150 миэстэлээх оскуоланы тутууга Бэрэсидьиэн Владимир Путин уһук илиҥҥи субсидияны бэрдэрбитэ. Өрөспүүбүлүкэ бүддьүөтүттэн эбии үп көрүллүбүтэ. Үбүлээһин кээмэйэ - 567 мөл. солк. Тутуу иэнэ - 3 тыһ. кв. тахса. Манна успуорт уонна аактабай саалалар, бибилэтиэкэ, остолобуой, мэдиссиинэ кэбиниэтэ, мастарыскыайдар, лаборантскай уонна административнай хостор киирэллэр. Оскуола миэбэлинэн, үөрэтэр тэрилинэн, көмпүүтэринэн, интерактивнай дуоскаларынан толору хааччыллыылаах. Тиэргэнигэр успуорт былаһаакката уонна путбуол хонуута бааллар. Бүгүн манна 120 оҕо үөрэнэр уонна 26 педагог үлэлиир.
Атамай орто оскуолата агрономиялыы хайысхалаах. Тэрилтэ бэйэтэ оҕуруоттаах, ол иһигэр «өйдөөх тэпилииссэлээх». Ону сэргэ, билимнии-чинчийэр уонна оҥорон таһаарар агропитомник-киин үлэлиир. Үөрэнээччилэр түргэнник ситэр дьиэ көтөрүттэн уонна үүнээйиттэн бэйэлэрэ бородууксуйа оҥорон таһаараллар. 2023 сыллаахха оскуола «СӨ оскуолатааҕы бизнес-инкубатора» ыстаатыһы ылбыта.
Санатар буоллахха, 2021 сыл сайыныгар Бэс Күөлэ сэлиэнньэ биир кыбаартала уокка былдьаммыта. Социальнай эбийиэктэр умайбатахтара эрээри, саҥардыы ирдэнэрэ. Ол курдук, оскуолалара 1980 сс. тутуллубут мас дьиэҕэ үлэлээн турбута. Онон, 2022 с. Бэрэсидьиэн сорудаҕынан манна оскуола уонна МФЦ тутуута саҕаламмыта.
