СӨ Үөрэххэ уонна билимҥэ министиэристибэтин иһитиннэриитинэн, «Земскэй учуутал» федеральнай тосхол иитинэн, 2020-2024 сс. барыта 89 квота туһаныллыбыт. Итинтэн 45-һэ Арктика улуустарыгар барбыт.
Билигин тыа сирин оскуолаларыгар үлэлии сылдьар 84 педагог өрөспүүбүлүкэ куораттарын уонна атын регион оскуолаларыттан ыҥырыллан тиийбиттэр. Олор истэригэр математика учуутала Чайзатмаа Донгак Тыва өрөспүүбүлүкэтиттэн Томпо оройуонун Хандыга орто оскуолатыгар кэлэн иккис сылын үлэлии сылдьар. Эмиэ математика уонна информатика учуутала Ирина Тыжинова Улан-Удэ куораттан Нерюнгри оройуонун Серебряный Бор бөһүөлэгин 14 №-дээх оскуолатыгар үлэлии сылдьар. Кэлии педагогтар Саха сирин усулуобуйатыгар үөрэнэр уустугун, онуоха кэлэктиип көмөтө улахан суолталааҕын ыйаллар.
Быйыл «Земскэй учуутал» тосхолунан педагогтары сүүмэрдиир күрэскэ Саха сирин, Ханты-Мансийскай автономнай уокурук, Забайкальскай кыраай, Ростовскай уобалас, Хабаровскай кыраай, Тыва, Алтай уонна Башкортостан өрөспүүбүлүкэлэрин 17 учуутала талыллан араас улуустарга үлэлии бардылар.
2020 сылтан тосхол усулуобуйатынан, 50 тыһыынчаҕа тиийбэт нэһилиэнньэлээх сиргэ үлэлии барбыт педагог 1 мөл. солк. кээмэйдээх төлөбүрү ылар. Оттон Уһук Илиҥҥи федеральнай уокурукка бу төлөбүр кээмэйэ 2 мөл. солк. тэҥэнэһэр.
Сонун төрдө: CӨ Бырабыыталыстыбатын уонна Ил Дарханын пресс-сулууспата
