«Аҕа дойдуну көмүскээччилэр» пуонда Саха сиринээҕи салаатын үлэтин биир сүрүн хайысхатынан анал байыаннай дьайыы кыттылаахтарыгар уонна кинилэр дьиэ кэргэннэригэр босхо юрист көмөтүн оҥоруу буолар. Ол туһунан салайааччы солбуйааччыта Александр Захаров кэпсээтэ.
«Биһиэхэ араас кыһалҕалаахтар кэлэллэр: байыаннай сулууспалаахтары уонна кэргэннэрин дьиэнэн хааччыйыы, кыайан ылбатах төлөбүрдэрин бэрдэрии, араас төрүөтүнэн сулууспаттан босхолооһун, байыаһы өлбүтүнэн билинии, аҕа буолууну, бииргэ олорууну уонна оҕону иитиини сокуонан быһаартарыы, кэргэнниилэр мөккүөрдэрэ, баайга-дуолга, үпкэ-харчыга эбээһинэһи толорууга мөккүөрдэр. Биһиги маны барытын тиһэҕэр тиэрдэ сатыыбыт», – диэн кини иһитиннэрдэ.
Кыһалҕалаахтар маҥнай социальнай координатор нөҥүө приёмҥа суруйтараллар. Ону сэргэ кинилэр Босхо юрист көмөтүн киинин албакааттарыгар: Дьокуускай к. Ленин пр. 28-с дьиэтин 209-с кэбиниэтигэр үлэ күнүгэр 9:00 чаастан 13:00 часка диэри тиийиэхтэрин сөп. Маны таһынан, салааҕа СӨ Борокуратуурата байыаннай борокуруору кытта – ый иккис уонна төрдүс бээтинсэтигэр, албакаат – нэдиэлэ ахсын аан уонна орто күҥҥэ, киһи быраабын боломуочунайа – ый ахсын дьону кытта үлэлииллэр.
Сонун төрдө: СӨ Быраабыталыстыбатын уонна Ил Дарханын пресс-сулууспата
