Дьэ, кэмниэ-кэнэҕэс, киин куорат суруналыыстарыгар саҥа болуоссаты көрдөрдүлэр. Оннооҕор дьаарбайа тахсыбыт дьон көрбүттэрэ, оттон биһиги – саҥардыы.
Тус бэйэм, сабыылаах турдаҕына, төгүрүк быһыылаах иҥнэри тутууну ыраахтан атыҥырыы көрөрүм. Ол санаам, иһирдьэ киирээппин кытары, суох буола түстэ. Болуоссаппыт оннук кэҥээбит, ырааһырбыт, тупсубут. Биһиэхэ муусукалаах фонтаны холбоон көрдөрбөтүлэр эрээри, олус элбэҕи кэпсээтилэр, быһаардылар.
Ол курдук, Архитектура уонна куораты тутуу управлениетын салайааччыта Любовь Папок этэринэн, оҥоһуу «алааска» тэлгэммит газон ото бөҕөргүөр диэри икки сыл ааһыахтаах эбит. Кини киин куорат олохтоохторун уонна ыалдьыттарын болуоссат эбийиэктэригэр харыстабыллаахтык сыһыаннаһарга, үрдүк тутууттан сырылаабакка сэрэхтээхтик сылдьарга ыҥырда. Оттон кыһыҥҥы кэмҥэ хаарынан бүрүллүбүт «алаас» сабыллан туруоҕа.
«Саҥа болуоссаты «Өрөспүүбүлүкэ болуоссата» диэн ааттыыр боппуруос киирбитэ дуо?» диэн ыйытыыбар салайааччы «Оннук этии киирбитэ, кэм-кэрдии быһаарыа» диэн хоруйдаата.
«Якутпроект» тэрилтэ сүрүн архитектора Иннокентий Николаев этиититтэн саҥа фонтан олус уустук оҥоһуулааҕын, маны 60 носуос хааччыйарын биллибит. Ону алаас курдук быһыылаах тутуу анныгар саһыарбыттар. Болуоссаппыт Арассыыйа биир улахан болуоссатын быһыытынан биллэр эбит. Сэргэлэрбит арчылыыр-араҥаччылыыр күүстэрин таһынан болуоссаты сырдатар, муусука тыаһатар уонна видеоҕа уһулар аналлаахтара сөхтөрдө. Болуоссакка эһиил өссө күн чаһытын уонна чолбон сулуһу оҥорон туруоруохтаахтар. Бары билэрбит курдук, бу эттиктэр саха итэҕэлигэр сүдү суолталаахтар.
СӨ Композитордарын сойууһун бэрэссэдээтэлэ Николай Михеев иһитиннэрбитинэн, фонтан муусукатын плейлииһин кинилэргэ хомуйтарбыттар. Онон, манна аан дойду таһымнаах классиканы кытары Саха сирин композитордарын чулуу айымньылара киирбиттэр. Худуоһунньук Туйаара Шапошникова болуоссаппыт уота-күөһэ, тыаһа-ууһа Канадаҕа дьыл хараҥа кэмигэр депрессияны уһуларга анаан оҥоһуллубут уопсастыбаннай уораҕайдарга майгынныырын бэлиэтээтэ. Маны сэргэ, кини болуоссакка билиитэлэри ууруу күн эргиирин санатарын, ол ордук үөһэттэн көрдөххө биллэрин тоһоҕолоон эттэ.
Ити курдук бу пресс-туртан саҥа болуоссаппыт өркөн өйдөр түмсүүлэриттэн үөскээн тахсыбытын, сүрдээх киэҥ, дириҥ ис хоһооннооҕун уонна бар дьону саха бөлөһүөпүйэтин тула түмэр аналлааҕын өйдөөн таҕыстыбыт. Аҕыйах күнүнэн саҥа уопсастыбаннай уораҕайбыт аһыллан, санаабытын көтөҕүө, олохпутун киэргэтиэ. Оттон эһиил саас Өрөспүүбүлүкэ күнүгэр саҥа болуоссакка добун оһуохай дуорайыа.
Болуоссат иһин сэгэтэн көрдө КҮНДЭЛИ.
