«Сахаэнерго» АУо Өлөөннөөҕү уот ситимин оройуонугар Донецкай норуодунай өрөспүүбүлүкэ Авдеевка куоратын босхолооһуҥҥа бойобуой соругу толоро сылдьан дьоруойдуу охтубут энэргиэтик Константин Михайловы кэриэстээтилэр. Хорсун байыас олохтон туораабыта биир сылын туолуута, алтынньы 13 күнүгэр, кини 20-тэн тахса сыл үлэлээбит тэрилтэтин эркинигэр өйдөбүнньүк бэлиэ ыйаатылар.
Константин Васильевич Мииринэй оройуонун Айхал бөһүөлэгэр төрөөбүт, ол эрээри олоҕун улахан аҥаара Өлөөҥҥө ааспыт. Уот ситимин эйгэтигэр тэрилтэ хайа төрүттэммит 2001 сылыттан үлэлээн саҕалаабыт. Дизель ыстаансыйатын өрөмүөннүүр силиэсэртэн үрдүк күүрээннээх лииньийэлэри уонна трансформатордаах кыра ыстаансыйалары өрөмүөннүүр, уот тэрилин-ситимин хааччыйар аҕа маастарга тиийэ үүммүт. Ити курдук 2013 сылтан эҥкилэ суох үлэлээн кэлбит.
Кини 2023 сыл бэс ыйыгар анал байыаннай дьайыыларга кытта тус баҕатынан барбыт. Алын сержант званиелаах «Амака» позывнойдаах сулууспалаабыт. Бэрэсидьиэн Ыйааҕынан Константин Михайлов өлбүтүн кэннэ Эр санаа уордьанынан наҕараадаламмыта. Кэргэнэ Василиса Васильевна кэриэстиир тэрээһиҥҥэ «Сахаэнерго» тэрилтэҕэ болҕомтолоох уонна кыһамньылаах сыһыаннарын, көмөлөрүн иһин махтанна.
Сонун төрдө: «Сахаэнерго» АУо пресс-сулууспата
