Саха сиринээҕи Expo Skills ИТ-оскуола филиала Донецкай норуодунай өрөспүүбүлүкэ Кировскай куоратыгар балаҕан ыйыттан саҕалаан тэйиччиттэн 100 оҕону үөрэттэ. Бу куоракка бастакы ИТ-киин Ил Дархан Айсен Николаев сорудаҕынан аһыллыбыта.
«Биһиги оскуолабыт ааптардыы ньыманан 7-тэн 17-гэр диэри саастаах оҕолору саайт оҥорорго, оонньуулары толкуйдаан дизайынныырга уонна 3D моделированиеҕа үөрэтэр. Ол түмүгүнэн үөрэнээччилэр бырайыак көмүскүүллэр. Манна уруоктар Москуба бириэмэтинэн буолбуттара, онон учууталлар түүннэри үлэлээтилэр. Оҕолор үөрэх саҕаланарын олус кэтэспиттэр этэ. Кинилэр бу үөрэҕи кытта инникилэрин ситимнииллэр», - диэн оскуола дириэктэрэ Дьулустаан Никаноров кэпсээтэ.
Expo Skills ИТ-оскуола уопутун саҥа эрэгийиэннэргэ тарҕатарга Бэрэсидьиэн Владимир Путин этии киллэрбитэ. Онон, Кировскай куорат холобурунан хас биирдии саҥа эрэгийиэҥҥэ уоннуу кылааһы арыйар санаалаахтар. Манна оскуола Ил Дархан гранын күрэҕэр кыайыыта уонна СӨ Инновацияҕа уонна сыыппара сайдыытыгар министиэристибэтин өйөбүлэ төһүү буолуоҕа.
Сонун төрдө: СӨ Бырабыыталыстыбатын уонна Ил Дарханын пресс-сулууспата
