Ил Дархан ДНР байыаннай чаастарыгар тиийэн, Саха сириттэн сылдьар байыастары кытта көрүстэ. Айсен Николаев АБДь кыттыылаахтара бэлэмнэнэр полигоннарыгар сырытта, ону тэҥэ пилота суох көтөр аппарааттар кииннэрин үлэтин билистэ.
“Бэйэ дьоно бэйэ дьонун курдук олус истиҥник, элбэх хос саҥата, формальноһа суох судургутук көрүстүбүт. Үгүс уолу билэр, урут алтыһан ааспыт, кинилэр тустарынан истибит, күүстэрин-уохтарын, халбаҥнаабат кытаанах санааларын көрбүт эбиппин. Кинилэр хас биирдиилэрэ тус-туспа, сорохторо судургута суох, дьылҕалаахтар. Ол гынан баран, кинилэр билигин биһиги барыбыт Кыайыытын туһугар киирсэ сылдьаллар.
Уолаттар биһигини көрөн олус үөрдүлэр, күннээҕи олохторун, үлэлэрин туһунан кэпсээтилэр, төрөөбүт Сахаларын сиригэр эҕэрдэлэрин ыыттылар. Көрдөһүү, баҕа санаа да этилиннэ. Ону барытын суруннубут, туох даҕаны болҕомтото суох хаалыа суоҕа. Биир дойдулаахтарбыт үлэлиир, байыаннайдары бэлэмниир полигоннарыгар сырыттым, пилота суох көтөр аппарааттар кииннэрин үлэтин билистим. Хамандыырдары кытта кэпсэттим. Саха сирин байыастара чиэстээхтик сулууспалыылларын, тулуурдаах, эрдээх сүрэхтээхтэрин истэн мэлдьи үөрэбин. Саха сирэ кинилэри киэн туттар! Барыларын Кыайыы көтөллөөх күүтэбит!” – диэн Айсен Николаев телеграм-каналыгар суруйбут.
Ити сырыы кэмигэр Ил Дархан АБДь кыттыылаахтарыгар “Сокол” вездеходтары илдьэн туттарда. Ону таһынан, ДНР-га сылдьан шефтээх Докучаевскайга уонна Еленовка бөһүөлэккэ чөлүгэр түһэрэр үлэ хаамыытын билистэ.
