Ил Түмэҥҥэ Билимҥэ уонна үөрэххэ кэмитиэтин мунньаҕа буолла. Кыттыылаахтар Антонина Григорьева,Александр Подголов, Захар Никитин көҕүлээһининэн «СӨ Тылларын туһунан сокуоҥҥа уларытыылары киллэрии туһунан» сокуон бырайыагын дьүүллэстилэр.
Кэмитиэт бэрэссэдээтэлэ Антонина Григорьева өрөспүүбүлүкэтээҕи сокуону федеральнайга сөп түбэһиннэрии уонна тиэрминнэрин биир халыыпка киллэрии ирдэнэрин бэлиэтээтэ. Быһаччы эттэххэ, кыттыылаахтар сүрүннээн сокуон эрэдээксийэлэммит тиэкиһин көрдүлэр уонна бигэргэттилэр. Чуолаан, сокуоҥҥа «саха язык» тиэрмин оннугар «язык саха» диэн тиэрмини туттарга быһаардылар.
Маны сэргэ сокуону туттуу эйгэтин чопчулааһын быһыытынан 1 ыстатыйаҕа «РФ Норуоттарын тылларын туһунан» сокуон ыстатыйатын 2-с пуунугар сөп түбэһэр саҥа апсааһы киллэрдилэр. Салгыы 39-с ыстатыйаны «Сокуон ирдэбиллэрин кэһии Саха Өрөспүүбүлүкэтин сокуоннарыгар сөп түбэһиннэрэн эппиэтинэскэ тиэрдэр» диэн сааһылаан биэрдилэр.
Мунньах кыттыылаахтара Ил Түмэҥҥэ сокуон бырайыагын бастакы уонна тиһэх ааҕыыга өйүүргэ уонна ылынарга быһаарыннылар.
Сонун төрдө: Ил Тумэн пресс-сулууспата
