Дьокуускай – Аллараа Бэстээх – Дьокуускай хайысханан дьону тиэйэр-таһар салгын олбохтоох суудуналар сыаналара алтынньы 22 күнүттэн 2500 солкуобай буолла. Ол туһунан “ЛенаВодСервис” тэрилтэ салайааччыта Борис Строев иһитиннэрдэ.
“Өрүс балаһыанньата уустугурда, кыдьымах хойуутук киирэн эрэр. Онон сибээстээн, уматык ороскуота элбээтэ, тарыып 2 тыһыынчаттан 2,5 тыһыынча солкуобай буолла. “ЛенаВодСервис” уонна “Лена-Транс” биригээдэлэрэ холбостубут. Онон, барыта 25 суудуна сүүрэр буолла. Суудуналар сарсыарда 07:00 чаастан киэһэ 18:00 чааска диэри Дьокуускай 204-с түөлбэтиттэн сылдьаллар”, – диэн Строев кэпсиир.
Санаттахха, алтынньы 22 күнүттэн паромнар сыаналара эмиэ үрдээтэ, ахсааннара аҕыйаата. Сэтинньиттэн Жатай – Төхтүр хайысханан ледокол сылдьыаҕа.
Бэй.кэр.
