2025 сылга улуу суруйааччы Өксөкүлээх Өлөксөй «Байанай алгыһа» поэмата суруллубут сылыттан ааҕыллар суолталаах даатаны – Саха литэрэтиирэлии суруга-бичигэ төрүттэммитэ 125 сылын бэлиэтиэхпит. Бырабыыталыстыба бэрэссэдээтэлин солбуйааччы Сергей Местников үбүлүөйдээх тэрээһиннэргэ бэлэмнэнии туһунан мунньахтаата.
Ол курдук, кэлэр сылга саха суруйааччылара төрөөбүт дойдуларынан билим-быраактыка эпсэдииссийэлэрин, А.И. Софронов-Алампа сылдьыбыт суолунан Өлүөнэ өрүс устун литэрэтиирэлии эспэдииссийэни, АЛРОСА эбийиэктэринэн эдэр литэрээтэрдэр, худуоһунньуктар эспэдииссийэлэрин тэрийэн ыытыахтара.
Биир сүрүн бырайыагынан саха литэрэтиирэтин устуоруйатын туһунан хаартыска олбуомун оҥоруу буолла. Кулун тутарга оскуола үөрэнээччилэрин ортотугар өрөспүүбүлүкэтээҕи литэрэтиирэ күрэҕэ ыытыллыа. Манна оҕолору өрөспүүбүлүкэ бары улуустарыттан кытыннарар сорук турар.
Сыл ахсын ыытыллар ыччат «Муус устар» бэстибээлин чэрчитинэн, «Биһиги эдэрбит» (Мы молодые) пуорум ыытыллыаҕа. Манна литэрэтиирэҕэ, суруналыыстыкаҕа, киинэ драматургиятыгар, драматургияҕа уонна кириитиэкэҕэ холонор 25 диэри саастаах айар-тутар ыччат кыттыаҕа. Маны таһынан, үрдүкү кылаас оҕолоругар өрөспүүбүлүкэтээҕи сайыҥҥы лааҕыр үлэлиэҕэ.
«Книжный ветер» бэстибээли саха литэрэтиирэлии суруга-бичигэ төрүттэммитэ 125 сылыгар аныахтара. Оттон бэлиэ күн сүрүн тэрээһинэ Норуоттар икки ардыларынааҕы «Үрүҥ хаар алгыһа» поэзия бэстибээлэ эһиил алтынньыга буолуоҕа.
Сонун төрдө: СӨ Бырабыытаылстыбатын уонна Ил Дарханын пресс-сулууспата
