Бүгүн эдэркээн дьоруойдарга Арассыыйа Федеральнай Мунньаҕын «Эр санааны көрдөрүү иһин» мэтээлин үөрүүлээхтик туттарыы буолла. Наҕараадаҕа 3 оскуола оҕото: Ромеш Муратов, Роберто Ноев уонна Николай Жирков тигистилэр. Кинилэр Дьокуускайга буолбут баһаардарга дьону быыһаабыттар. Оҕолору Арассыыйа ЫБММ управлениетын эрэгийиэннээҕи салайааччыта Павел Гарин эҕэрдэлээтэ.
Ромеш Муратов ыам ыйыгар сарсыарда элбэх кыбартыыралаах дьиэ умайбытыгар кыбартыыратыттан кыайан тахсыбакка хаалбыт 2 группалаах инбэлиити түннүгүн алдьатан киирэн көхсүгэр сүгэн таһаарбыта. Ыксаллаах түгэҥҥэ Ромеш биир да сөкүүндэ саарбахтаан турбакка хамсаммыта диэн суруйаллар.
Доҕордуулар Роберто уонна Коля бэс ыйыгар бэлэсипиэтинэн хатааһылыы сылдьан икки этээстээх дьиэ умайа турарын көрбүттэр. Онно доҕордорун эбээтэ олорорун өйдөөннөр, сиргэ матараас быраҕан саастаах киһиэхэ иккис этээстэн түһэрбиттэр, онтон атын дьоҥҥо көмөлөспүттэр.
Ити курдук оҕолор баһаарынайдар кэлиэхтэригэр диэри дьон олоҕун быыһаабыттар. Кинилэр хорсун быһыылара, эр санаалара атын оҕолорго холобур буолуоҕа. Тэрээһин Бүтүн Арассыыйатааҕы XI «Оҕолор – дьоруойдар» бырайыак иитинэн ыытыланна. Манна хорсун быһыыны оҥорбут 16 диэри саастаах кыргыттар уонна уолаттар кытталлар.
Сонун төрдө: РФ ЫБММ Саха сиринээҕи управлениета
