Сэтинньи 5 күнүгэр сарсыарда 08:18 чааска (олохтоох бириэмэнэн) “Восточнай” космодромтан “Союз-2” аракыата көтүөхтээх. Ол тобохторо Саха сиригэр Алдан, Өлүөхүмэ, Бүлүү уонна Үөһээ Бүлүү улуустарыгар түһүөхтээхтэр. Ити туһунан СӨ Гражданскай оборуонаҕа уонна олоххо-дьаһахха куттал суох буолуутугар министиэристибэтэ иһитиннэрэр.
Ол курдук, аракыата төбөтүн чаастара (головной обтекатель) Алдаҥҥа уонна Өлүөхүмэҕэ, оттон киин блогун уонна төрдүн (хвостовой отсек) кырамталара Бүлүү уонна Үөһээ Бүлүү улуустарыгар саккырыахтаахтар.
Министиэристибэ пресс-сулууспата суруйарынан, Алдаҥҥа уонна Бүлүүгэ СӨ быыһыыр сулууспатын толору сэбилэниилээх быыһааччылара тиийэн үлэлиэхтэрэ, куттал суох буолуутун хааччыйыахтара.
“Ытыктабыллаах өрөспүүбүлүкэ олохтоохторо, булчуттар, табаһыттар уонна балыксыттар! Аракыатаны көтүтэр кэмнэригэр кини кырамталара түһүөхтээх сирдэригэр тыаҕа-ойуурга тахсартан туттунуҥ!
Нэһилиэнньэлээх пууннар территорияларыттан тахсымаҥ уонна сэрэхтээх буолуҥ диэн көрдөһөбүт. Ыксаллаах быһыы-майгы үөскээтэҕинэ – “112” нүөмэргэ эрийиҥ”.
