Норуот сомоҕолоһуутун күнүн көрсө, “Мегафон” хампаанньа аналитиктара Арассыыйаҕа кинилэр абоненнара ордук ханнык омуктар тылларынан тахсар саайтары көрөллөрүн чинчийбиттэр.
Ол курдук, 2024 с. саҕаланыаҕыттан, былырыын баччалардааҕыны кытта тэҥнээтэххэ, сахалыы тыллаах порталларга киирэр дьон ахсаана (трафик эбиллиитин көрөллөр) 51%-нан улааппыт. Сахалыы тыллаах порталлары көрөөччү 87%-на Саха сиригэр олорор буоллаҕына, 13%-на – атын эрэгийиэҥҥэ. Ол иһигэр ордук Москубаттан, Санкт-Петербуртан, Приморьеттан, Тула уобалаһыттан уонна Краснодар кыраайыттан көрөллөр эбит.
Дьон саамай ааҕар сахалыы тыллаах интэриниэт саайтара: “Эркээйи”, “Кыым” хаһыаттар, “Саха” НКИХ, СИА, “Эдэр саас”, Улус.Медиа”. Ити таһаарыылар бүттүүн трафик 67%-нын ылаллар. Ол кэннэ электроннай тылдьыттар, саха тылын үөрэтэр онлайн-сиэрбистэр кэлэллэр эбит.
Итини таһынан, интэриниэт түһүлгэтигэр эбэҥки тылыгар интэриэс улааппыт. Эбэҥки тыла өрөспүүбүлүкэ иһигэр тарҕаныытынан нуучча уонна саха тылларын кэннэ үһүс миэстэҕэ тахсыбыт. Ол курдук, ааспыт сыллааҕыны кытта тэҥнээтэххэ, туһанааччы ахсаана 50%-нан эбиллибит. Саха сирин таһынан эбэҥки тылын Москубаҕа, Москуба уобалаһыгар, Красноярскай кыраайга, Санкт-Петербурга, Приморьеҕа, Краснодар кыраайыгар, Бүрээтийэҕэ, Татарстаҥҥа уонна Чукоткаҕа сэргииллэр эбит. Дьон ордук цифровой тылдьыттары уонна тылы үөрэтэр сиэрбистэри туһаммыт.
“Дьон саха уонна эбэҥки тылларынан тахсар саайтары өрөспүүбүлүкэҕэ да, атын да эрэгийиэннэргэ сэргиир. Ити саайтар атын сиргэ олорор дьон төрөөбүт дойдуларын кытта ситимнэрин туталларыгар, төрөөбүт тылларын харыстыылларыгар көмөлөһөллөр. Интэриниэт ресурсалар ордук тыа сиригэр олорор дьоҥҥо суолталаахтар. Онон, биһиги сибээс инфраструктуратын сайыннарабыт. Бүтэһик сонуннартан аҕыннахха, соторутааҕыта Күннүк Уурастыырап дойдутугар, Амма Эмиһигэр, ыстаансыйабытын саҥартыбыт. Онно оскуола түөлбэтигэр кини түмэл-дьиэтэ үлэлиир. Саҥардыы түмүгэр, үөрэнээччилэр да, учууталлар да үөрэх интэриниэт сиэрбистэрин туһанар буоллулар. Ол иһигэр тылы үөрэтэллэр”, – диэн “Мегафон” Саха сиринээҕи салайааччыта Наталья Некрасова этэр.
Бэй.кэр.
