Нерюнгри оройуонугар Олоҥхо Ыһыаҕын 2025 сыл от ыйын 4 уонна 5 күннэригэр ыытарга быһаардылар. Тэрээһини үөрүүлээхтик арыйыы уонна сабыы режиссерунан Руслан Тараховскай бигэргэннэ.
Ыһыахха бэлэмнэнии боппуруостарын бырабыыталыстыба бэрэссэдээтэлин солбуйааччы Сергей Местников салайааччылаах тэрийэр кэмитиэт мунньаҕар көрдүлэр. Бу иннинэ алтынньы14-17 күннэригэр Нерюнгри оройуонугар бөлөх тиийэн үлэлээбитэ. Манна даҕатан, кэлэр сыл олунньу 5-7 күннэригэр Нерюнгрига билим-мэтиэдикэ кэмпириэнсийэтэ ыытылларын бэлиэтиибит.
Мунньах түмүгүнэн, СӨ Култуураҕа уонна духуобунай министиэристибэтэ, Олоҥхо института уонна ассоциацията Нерюнгри оройуонун дьаһалтатын кытта ахсынньы 1 күнүгэр диэри Олоҥхо Ыһыаҕын кэнсиэпсийэтин, эмблиэмэтин, брендугун оҥорон бигэргэтиэхтэрэ, ыһыахха туһаныллар эбийиэктэр туруктарын, өрөмүөннэрин торумнуохтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
