Сэтинньи 13 күнүгэр “Сахабулт” ФАПК АУо дьиэтигэр тэрилтэ инники саҕахтарын арыйар кэскиллээх үтүө тэрээһин буолан ааста.
Бастакы Бэрэсидьиэммит Михаил Ефимович Николаев 32 сыл анараа өттүгэр, оруобуна 55 үбүлүөйдээх сааһыгар сылдьан, Саха сиригэр төрүт дьарыкпытын сөргүтэр, үйэтитэр, омук быһыытынан тыйыс усулуобуйаҕа олорор уратыбытын көрдөрөр соруктаах “Сахабулт” национальнай концерны тэрийэр туһунан 241 №-дээх СӨ Бэрэсидьиэнин Ыйааҕын таһаарбыта.
Улуу киһибит төрөөбүт күнүгэр “Сахабулт” бары үлэһиттэрэ, махтанан-сүгүрүйэн туран, “Олоҕо барыта норуотугар сулууспаҕа анаммыта: киһи, бэлиитик уонна номох” диэн тэрээһини ыыттылар. “Сахабулт” салайааччыта Виктор Пермяков үлэһиттэригэр инники өттүгэр ханнык кэскиллээх хамсаныылар, үрдүк кирбиилэри ылар тыҥааһыннаах туох үлэ күүтэрин туһунан кэпсээтэ. Кини СӨ Бырабыыталыстыбатын Бэрэссэдээтэлин бастакы солбуйааччыта Дьулустан Борисов тэрилтэни өйүүр, кыайыылаах-хотуулаах суолунан сайдарын түстүүр мунньаҕын Боротокуолун кытта билиhиннэрдэ.
Биһиги М.Е. Николаев саҕалаабыт дьыалатын иһин эппиэтинэс сүгэбит, онон тэрилтэбитин хайаан да билигин үөскээбит үп ыарахан туругуттан таһаарыахтаахпыт, сайыннарыахтаахпыт диэн үлэ кэлэктиибин ыҥырда.
Сонун төрдө: “Сахабулт” ФАПК АУо
