Сэтинньи 13 күнүгэр СӨ Национальнай архыыба Яндекс «Поиск по архивам» сиэрбиһин туһанан докумуоннары булууга бииргэ үлэлиир туһунан сөбүлэһии түһэристилэр. Саҥа бырайыак көмөтүнэн Саха сирин олохтоохторо төрүттэрин туһунан чахчылары булар кыахтаныахтара.
«Яндекс» хампаанньа оҥорбут сиэрбиһэ ааттары, араспаанньалары, нэһилиэнньэлээх пууннары уонна хайа баҕарар чахчылары XVIII – XX үйэ саҥатыгар илиинэн суруллубут тиэкистэргэ көрдүүр устуруокаҕа туһааннаах тылы киллэрэн булар кыаҕы биэрэр. Билигин дааннайдаах база дойду 18 регионуттан 15,5 мөл. тахса архыып дааннайын көрдөрөр кыахтаах.
Сиэрбис Яндекс тиэкиһи оптическай билии технологиятын базатыгар үлэлиир. Нейроситимнэр архыып суругун өрөбөлүүссүйэ иннинээҕи уустук орфографиятын учуоттаан быһаараллар. Алгоритм буочар уратытын учуоттуур, эргэрбит буукубалары билэр уонна архыып докумуоннарын ураты тутулларын өйдүүр.
Сөбүлэһиигэ «Яндекс» хампаанньа аатыттан «Поиск по архивам» сиэрбис салайааччытын солбуйааччы Андрей Михеев уонна СӨ култууратын уонна духуобунай сайдыытын миниистирэ Афанасий Ноев илии баттаатылар. СӨ Национальнай архыыбын дириэктэрэ Петр Румянцев Яндексы кытта үлэлэһии төрүттэрин туһунан билиэн баҕалаахтарга улахан көмө буолуоҕун бэлиэтээтэ.
Сонун төрдө: СӨ Национальнай архыыба
