Саха сирин үөрэҕин кыһаларыгар 1030 устудьуону култуура эйгэтигэр анаан үөрэтэллэр. Миниистири солбуйааччы Марина Силина бэлиэтээбитинэн, каадырдары эрдэттэн бэлэмнээһин эрэгийиэни үрдүк таһымнаах исписэлиистэринэн хааччыйыыга уонна кинилэри олохсутууга усулуобуйа үөскэтэр.
Ол курдук, исписэлиистэри тус сыаллаах үөрэтии В. А. Босиков аатынан Муусука үрдүкү оскуолатыгар, А. уонна Н. Посельскайдар ааттарынан Балет оскуолатыгар, М. Н. Жирков аатынан Муусука колледжыгар, П. П. Романов аатынан Ойуулуур-дьүһүннүүр училищеҕа, А. Д. Макарова аатынан Култуура уонна ускуустуба колледжыгар барар.
Саха сиригэр билигин 487 култуура-аралдьытыы тэрилтэтэ баар. 10 тыһ. тахса киһи маннааҕы тыйаатырдарга, түмэллэргэ, кулууптарга, бибилэтиэкэлэргэ, Олоҥхо дьиэлэригэр уонна киинэ хампаанньаларыгар үлэлиир. Оттон кэнники сылларга 50 тахса култуура эбийиэгэ тутуллан үлэҕэ киирдэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата
