РФ Госдумата 2025–2027 сс. федеральнай бүддьүөт бырайыагын иккис ааҕыыга ылынна. Ол быһыытынан, ойуур уотун сэрэтэр тэрээһиннэргэ, сыл ахсын көрүллэр 1,6 млрд солкуобайы таһынан, эбии 2,7 млрд солкуобайы көрүөхтэрэ.
Ил Дархан Айсен Николаев иһитиннэрбитинэн, көрүллүбүт үп авиамониториҥҥа, ойуур баһаарын умуруорууга, «Авиалесоохрана» саҥа салааларын тэрийиигэ уонна баар салаалары күүһүрдүүгэ барыаҕа. СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин дааннайынан, 2025 сылга Өлүөхүмэ улууһугар –Саҥыйахтааҕы, Ленскэй оройуонугар – Витимнээҕи авиасалаалар, 2026 сылга – Эдьигээннээҕи уонна Орто Халыматааҕы, 2027 сылга – Абыйдааҕы авиасалаалар тэриллиэхтэрэ.
Билигин «Авиалесоохрана» тэрилтэ штата 740 киһилээх. Үбүлээһин түмүгэр штат 375 үлэһитинэн кэҥиэ. Итинтэн 316-та баһаар сулууспатын парашютистара уонна десантниктара буолуохтара. Онтон атыттара – кэтээн көрөр лүөччүктэр, суоппардар уонна тиэхиньиктэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата
