Саха сирэ 2025 сылга Донецкай Норуодунай Өрөспүүбүлүкэҕэ шефтэһэр Докучаевскай куоратыгар уонтан тахса эбийиэги саҥардыахтаах. Өрөспүүбүлүкэ инники Кировскай куораты кытта шефтэһэн 50 тахса социальнай инфраструктуралаах эбийиэги саҥардыбытын санатабыт.
«Өрөмүөннүүр-саҥардар үлэлэр Докучаевскай 65 эбийиэгэр бара тураллар. Манна суол ситимин сөргүттүбүт, дьиэлэр үрүттэрин өрөмүөннээтибит, түннүктэри уонна ааннары уларыттыбыт, Еленовкаҕа тэрилтэ дьиэтин саҥардан оҥордубут, элбэх кыбартыыралаах 53 дьиэҕэ түннүктэрин уларыттыбыт», – диэн Ил Дархан Айсен Николаев кэпсээтэ.
Кини этэринэн, эһиил Докучаевскайга Оҕо уонна эдэр ыччат айар дьиэтин өрөмүөнүн, инженернэй ситимнэри, массыына суолун, пааматынньыктары, үөрэх эбийиэктэрин уонна куорат пааркатын сөргүтүөхтэрэ. Өссө Ил Дархан манна Ыччат уонна IT киинин тэрийэр санаалааҕын иһитиннэрдэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата