Арассыыйа юристарын ассоциацията юрдиктант.рф порталга ахсынньы 3 күнүттэн 12 күнүгэр диэри Бүтүн Арассыыйатааҕы быраап дьыктаанын суруйтарар. Дьыктаан түмүгүнэн сэртипикээт бэриллэр.
«Бу аахсыйа сокуоҥҥа ытыктабыллаах сыһыаҥҥа үөрэтэр уонна дьон эппиэтинэһин үрдэтэр. Дьыктааны алта тылынан: нууччалыы, кытайдыы, англиялыы, арабтыы, испаниялыы уонна португалиялыы суруйуохха сөп. Манна биллэр юристар, судаарыстыбаннай уонна уопсастыбаннай диэйтэллэр видеонан ыйытыылара киирдилэр. Былырыын дьыктааны Арассыыйаҕа уонна тас дойдуга олорор 1 137 280 киһи суруйбута», – диэн тэрийээччилэр кэпсииллэр.
Дьыктааны үс блокка араардылар: «Базовай», «Профессиональнай» уонна «Бизнес». Мантан талан биир чаас иһигэр 33 ыйытыыга хоруйданыллыахтаах. Балл муҥутуур ахсаана — 100. Түмүгэ тута көстөр. Оттон сөптөөх хоруйдары ахсынньы 13 күнүгэр таһаарыахтара.
Сонун төрдө: СӨ Бырабыыталыстыбатын уонна Ил Дарханын пресс-сулууспата
