Дьокуускай олохтооҕо киһи омук судаарыстыбатын кытта куомуннаһан уонна Арассыыйаҕа куттал суох буолуутугар хоромньуну таһаарар сорудахтары толорон, 4 сылга көҥүлэ сарбыллар уонна ботуччу ыстарааптанар буолла.
Арассыыйа УФСБ-тын Саха сиринээҕи салаатын үлэһиттэрэ ирдиир-көрдүүр үлэ кэмигэр Украина оборуонаҕа министиэристибэтин ГРУ-тун кытта кистээн үлэлэһэр Дьокуускай олохтооҕо киһи суолугар тахсыбыттар.
Бэрэбиэркэ түмүгэр биллибитинэн, 1984 с.т. эр киһи өстөөххө күрүүр, оттон мобилизация буолар түгэнигэр билиэн бэринэр санаалаах сылдьыбыт. Инньэ диэн кини интэриниэтинэн кистээн украиналары кытта сибээстэспит, Арассыыйа территориятыгар мобилизацияламмыт байыаннайдар, гуманитарнай көмөнү хомуйар пууннар тустарынан уонна да атын өстөөх интэриэһин тардыах информацияны хомуйан ыытарга этии киллэрбит. Омук анал сулууспаларын кытта үтүө баҕатынан үлэлэһиэх буолбут.
Итини таһынан, Украинаҕа бэриниилээҕин көрдөрөөрү, Арассыыйа сэбилэниилээх күүстэрин аатын-суолун хараардар дьайыыларын оҥорон баран, оннооҕу “кураатарыгар” хаартысканан отчуот оҥорон ыыппыт.
Эр киһи уочараттаах сорудаҕы толоро сырыттаҕына куттал суох буолуутун уорганнара туппуттар. Арассыыйа ХК 275.1 ыстатыйатынан (омук судаарыстыбатын, норуоттар икки ардыларынааҕы эбэтэр омук тэрилтэтин кытта кистээн үлэлэһии) холуобунай дьыала көбүтүллүбүт.
