Уһук Илин сэттэ эрэгийиэнигэр 2019 сылтан чиэһинэйэ суох тэрилтэлэртэн эмсэҕэлээбит 5,8 тыһ. дольщик быраабын көмүскээтилэр. Ол туһунан Территориялары сайыннарар пуонда генеральнай дириэктэрэ Ильшат Шагиахметов иһитиннэрдэ.
Албыннаппыт дьоҥҥо көмөлөһөргө федеральнай уонна эрэгийиэннээҕи мэхэньиисимнэри туһаналлар. Бастакы курдук, кыһалҕалаах эбийиэ тутуутун тиһэҕэр тиэрдэллэр уонна Кэтиир сүбэ быһаарыытынан компенсация төлүүллэр. Иккис курдук, тутууну бүтэрэргэ саҥа инвесторы булаллар, атын дьиэни биэрэллэр, компенсация төлүүллэр о.д.а. Хайа ньыманы туһанары субъект бэйэтэ быһаарар.
Ильшат Шагиахметов этэринэн, Пуонда кэтиир сүбэтин быһаарыытынан, Приморскай кыраайга 2602, Саха сиригэр 1124, Бурятияҕа 971 уонна Хабаровскай кыраайга 922 албыннаппыт киһиэхэ быраабын көмүскээтилэр.
Сонун төрдө: Территориялары сайыннарар пуонда
Хаартыска: Улус Медиа
