Ахсынньы 6 – 7 күннэригэр Дьокуускайга Арассыыйа эбээннэрин VI сийиэһэ ыытыллар. Дойду араас муннугуттан кэлбит эбээн норуотун бэрэстэбиитэллэрэ сийиэскэ норуоту, төрүт тылы, култуураны, төрүт олоҕу уонна дьарыгы-хаһаайыстыбаны харыстыыр, сайыннарар туһунан кэпсэтиэхтэрэ.
Бэһис чыыһылаҕа бырабыыталыстыба дьиэтигэр буолбут көрсүһүүгэ Эбээн норуотун ассоциациятын бэрэсидьиэнэ Анатолий Слепцов эппитинэн, билигин эбээннэр Арассыыйа биэс субъегар олороллор – Саха сиригэр, Хабаровскай уонна Камчаакка кыраайдарыгар, Магадаан уобалаһыгар уонна Чукотка автономнай уокуругар.
“Арассыыйаҕа барыта 19 тыһыынчаттан тахса эбээн олорор. Онтон 11,6 тыһыынчаттан тахсата – Саха сиригэр. Биһиги өрөспүүбүлүкэбитигэр саамай элбэх эбээн Эбээн Бытантай улууһугар түөлбэлээн олорр. Кинилэр тылларын, култуураларын, төрүт дьарыктарын тутан олороллор. СӨ Эбээннэрин ассоциацията 1990 с. тэриллибитэ”, – диэн Анатолий Слепцов кэпсиир. Бу иннинэ Арассыыйа эбээннэрин сийиэһэ 2018 сыллаахха Магадаан уобалаһын 65 сылын көрсө, Магадааҥҥа буолбута.
Магадаан уобалаһын Ис уонна информация бэлитиикэтигэр министиэристибэтин Национальнай бэлиитикэҕэ управлениетын салайааччыта Наталья Штумпф эппитинэн, сийиэс ыытыллыаҕыттан былаас уорганнарын, уопсастыбаннаһы уонна партнердары кытта араас хайысхалаах үгүс үлэ ыытыллыбыт.
“Ол курдук, “Хэбденек” диэн эбээн төрүт бырааһынньыга матырыйаалынайа суох төрүт култуура нэһилиэстибэтин 100 эбийиэгин иһигэр киирдэ. 2018 сылтан 20-тэн тахса эбээн суруйааччытын кинигэтэ таҕыста. Уобаласка икки этно-паарка тутулунна, бары кэриэтэ оройуоннарга ансаамбыллар тэрилиннилэр”, – диэн кэпсээн туран, Саха сиригэр ыытыллар сийиэс эмиэ ити курдук үтүө түмүктээх буолуо диэн эрэнэрин эттэ.
“Илкун” диэн Чукотка эбээннэрин уопсастыбаннай түмсүүтүн салайааччыта Алена Петровская ааспыт сийиэс түмүгүнэн Чукоткаҕа эбээннэр уопсастыбаннай тэрилтэлэрэ баар буолбутун кэпсээтэ.
“Биһиги Саха сирин кытта ыаллаһа олоробут. Онон чугас, истиҥ сыһыаннаахпыт. Биһигини манна олус үчүгэйдик көрүстүлэр. Саха сирин бырайыактарын кытта билсэн баран, бииргэ үлэлиирбитигэр кэккэ сөбүлэһиилэри түһэрсиэхпит диэн эрэнэбит. Сийиэс өрөсөлүүссүйэтигэр биһиги этиилэрбит барыта учуоттаныахтара”, – диэтэ.
Арассыыйа эбээннэрин VI сийиэһэ “Эбээн норуотун ассоциациятын” тэрээһининэн, Хоту, Сибиир уонна Уһук Илин аҕыйах ахсааннаах төрүт омуктарын ассоциациятын өйөбүлүнэн тэриллэр.
