Дьокуускайтан Магадааҥҥа тиийэр “Халыма” федеральнай суол биир саамай кутталлаах кэрчигин – норуокка биллэринэн, “Заячай Петляны” (662 – 692 км)– өрөмүөннээн бүтэрдилэр. 28,3 км усталаах кэрчиги 2020 сылтан саҕалаан оҥорбуттара, онно барыта 250-тан тахса исписэлиис үлэлээтэ. Ол туһунан “Бүлүү” федеральнай суол салалтата иһитиннэрэр.
Саҥардыллыбыт суол кэрчигин арыйар тэрээһиҥҥэ СӨ Көлөҕө уонна суол-иис хаһаайыстыбатыгар миниистирэ Владимир Сивцев, “Вилюй” Упрдор ФКУ салайааччыта Николай Андреев, Томпо улууһун баһылыгын бастакы солбуйааччыта Степан Кривошапкин уонна өрөмүөҥҥэ кыттыбыт бэдэрээттээх тэрилтэлэр кытыннылар.
Томпо улууһун сиригэр-уотугар киирэр “Заячай Петля” хайалаах сиринэн ааһар буолан, олус куттааллаах кэрчик дэнэрэ. Дэҥ-оһол да сотору-сотору тахсара.
Өрөмүөн кэнниттэн суол төрдүс тэхиньиичэскэй таһымнанна, кумах-таас кутулунна. Эрийэ-буруйа барар, утары иһэр массыынаны көрдөрбөт суол тоҕойдорун көннөрдүлэр, барыта 1,5 мөл. кубометр буор наасыбын куттулар.
Ону таһынан, суол өрөмүөнүн чэрчитинэн “Сеторым” (устата 96,7 м), “Долгочан” (72,6 м) уонна “Некуляк” (устата 48,5 м) үрэхтэри туоруур күргэлэри оҥордулар. Ити күргэлэр оҥоһуллуохтарын иннинэ, массыыналар үрэхтэри кэһэн туорууллара. Оттон халаан кэмигэр букатын даҕаны суол быстан хаалара.
Итини сэргэ исписэлиистэр 2 сиргэ суоппардар сынньанар тохтобулларын, 42 хахханы туттулар, суол бэлиэлэрин туруордулар.
Санаттахха, ити иннинэ “Халыма” айан суолугар 1121 – 1142 км кэрчигин эмиэ өрөмүөннээбиттэрэ, өссө биир сэрэхтээх-куттааллаах сири саҥардыбыттара.
Уопсайынан, “Вилюй” Упрдор быйыл Бүлүүлүүр уонна Халымалыыр суолларга барыта 154,2 км усталаах суолу нуормаҕа эппиэттиир гына тупсаран оҥордо.
