Бу күннэргэ Ил Түмэн дьиэтигэр биллиилээх айанньыт, сылгыһыт Дугуйдаан Винокуров Саха Өрөспүүбүлүкэтэ төрүттэммитэ 100 сыла туолар сылыгар Өймөкөөнтөн Москубаҕа диэри айанын туһунан РФ уопсай үөрэхтээһинин Бочуоттаах үлэһитэ, СӨ үөрэҕириитин туйгуна, Өймөкөөн улууһун уопсастыбаннай сэбиэтин бэрэссэдээтэлэ Розалия Кондакова “На священной лошади саха” диэн фотохроника кинигэтин сүрэхтэниитэ үрдүк өрө көтөҕүллүүлээхтик ааста.
111 сирэйдээх, өҥнөөх үрдүк хаачыстыбалаах кинигэ"СМИК" типографияҕа бэчээттэммит. Кинигэни Өймөкөөн улууһун дьаһалтата үбүлээбит.
Өймөкөөн улууһун баһылыга Александр Оконешников модун санаалаах Тымныы полюһун Өймөкөөн улууһун уолаттара Саха сирин былааҕын өрө туппутунан Арассыыйа үгүс эрэгийиэннэрин таарыйан, дойдубут тэбэр сүрэҕэр тиийбиттэрин санатта. Кини маннык үтүөкэннээх ыччаттары иитэн таһаарбыт төрөппүттэргэ Семен уонна Ирина Винокуровтарга ис сүрэҕиттэн махтанна. Баһылык биир дойдулаахтарыгар туруоруммут сыалы ситиһэргэ баҕаран туран, "бары ат үрдүгэр буолуоҕун!" диэн санаатын тиэртэ.
Дугуйдаан Винокуров устуоруйаҕа киирбит айана норуоппут киэн туттуута, саха сылгытын айанныыр кыаҕын, тулуурун, дьоҕурун дакаастыыр уникальнай көстүүтэ буолар. Кинигэ сүрэхтэниитигэр тыл этэригэр Дугуйдаан “айаммыт үйэтитилиннэ” диэн ааптар Розалия Кондаковаҕа махтанна. “Айаммыт бастаан ыарахан курдугун иһин, билигин санаатахха, бэрт интэриэһинэй, өйтөн сүппэт айан. Биһиэхэ өрөспүүбүлүкэбит эрэ дьоно-сэргэтэ буолбакка, бүтүн Арассыыйа олохтоохторо көмөлөспүттэрэ. Онон бу маннык улахан бырайыагы олоххо киллэрии - Арассыыйа ситиһиитэ, - диэн бэлиэтээн эттэ.
Дугуйдаан айанын туһунан кинигэ биһиги сылгыбытыгар улахан болҕомтону ууруохтаахпытын өссө төгүл санатар. Билигин хаһаайыстыбалар сылгыһыттара саастаах дьон. Сылгыһыт идэтигэр эдэр дьон сыстыыта, аты миинэр сылгыһыт да аҕыйах. Сылгы да төһө да айылҕа оҕото диэн аатырдар, күннэтэ кэрийэн көрүүгэ-истиигэ наадыйар.
Тыа ыччата куорат диэки эрэ көрөр буолбут, төрүт дьарыктарбыт аныгы эдэр дьону умсугуппат буолан иһэр кэмнэригэр Дугуйдаан буурҕа курдук ытыллан киирэн, саха сылгыта сайдарыгар бүтүн норуоту уһугуннарбыта Үрдүк Айыыларбыт ыйаахтарын курдук.
Онон үөһэттэн ананан, соруктанан кэлбит уолбут саха сылгытын туһугар ыһыктыбакка, чаҕыйбакка дьулуһан үлэлээн үтүө холобур буоларыгар элбэх алгыс тыллар этилиннилэр.
Владимир Степанов.
