Ахсынньы 21 күнүгэр «Триумф» успуорт киинигэр Саха сирин биир сүрүн тэрээһинэ – өрөспүүбүлүкэҕэ физкультурнай хамсааһыны төрүттээбит Николай Тарскай төрөөбүтэ 100 сылыгар аналлаах Чөмпүйүөннэр баллара ыытыллыаҕа.
«Режиссер Мийя Ефимованы кытта чаҕылхай шоуну бэлэмнии сылдьабыт. Хас биирдии көрөөччү чөмпүйүөннэр сүрэхтэрин сылааһын билиэ, кинилэр ситиһиилэриттэн кынаттаныа уонна саҥа дьыллааҕы сүргэҕэ куустарыа. Тэрээһин 17.00 саҕаланыа, кэлиитэ көҥүл, киириитэ босхо», - диэн СӨ физическэй култуура уонна успуорт миниистирин солбуйааччы Аида Антонова билиһиннэрдэ.
Бал сүрүн дьоруойдарынан саха успуордун сулустара – аан дойду таһымнаах успуорт маастара, чэпчэки атлетикаҕа ааттаах-суоллаах киһи, Париж Олимпийскэй оонньууларын кыттыылааҕа Сардаана Трофимова, успуорт үтүөлээх маастара, Лондон Паралимпийскэй оонньууларын боруонса призера Степанида Артахинова, идэтийбит кроссфит-атлет, өрөспүүбүлүкэ саамай күүстээх бөҕөһө Игнатий Чомчоев уонна Арассыыйа успуордун мас-рестлиҥҥэ маастара Борис Сдвижков буолуохтара.
Сонун төрдө: CӨ Бырабыыталыстыбатын уонна Ил Дарханын пресс-сулууспата
