Быйыл өрөспүүбүлүкэ бүддьүөтүн иккистээн көннөрүү түмүгүнэн тыа хаһаайыстыбатын сайыннарыы судаарыстыбаннай тосхолун олоххо киллэриигэ 15,885 млрд солкуобай көрүллүбүт. Ол туһунан агропромышленнай комплекс үлэтин түмүктэрин таһаарар мунньахха эттилэр.
Биир биэ төбөтүгэр субсидия ставкатын 3-тэн 5 тыһ. солкуобайга диэри улаатыннараннар быйыл сылгы ахсаана элбээтэ. Ол курдук, 2023 сыл сэтинньи 1 күнүгэр 240 329 төбө баар буоллаҕына, 2024 сылга – 243 428. Дьокуускайдааҕы көтөр фабриката тиэхиньикэтин саҥардыбытын түмүгэр сымыыты ылыы сыллааҕы кээмэйин 100 мөлүйүөҥҥэ тиийиэхтээх. Сабыылаах сиргэ үүнэр оҕуруот аһын баалабай хомуура 9 тыһ. туоннаны аһарбыт, бу былырыыҥҥытааҕар 19%-нан элбэх.
Бырабыыталыстыба бэрэссэдээтэлин солбуйааччы Сергей Местников бэлиэтээбитинэн, Ил Дархан Айсен Николаев 2030 сылга олохтоох оҥорон таһаарыы кээмэйин 1,5 төгүл үрдэтэргэ сыал туруорбут. Онон, өрөспүүбүлүкэҕэ бу хайысхаҕа үлэлиир сокуоннары көннөрөллөр. Холобура, эрэгийиэннээҕи субвенция туһунан сокуоҥҥа муниципальнай оройуоннарга, улуус иһигэр тыҥаан турар тыа хаһаайыстыбатын кыһалҕаларыттан көрөн, үбү-харчыны тыыралларыгар боломуочуйаларын кэҥэттилэр. Маны сэргэ кыра кыамталаах эбийиэктэри тутууга инбэстииссийэ өттүнэн боломуочуйа сорҕотун биэрдилэр. Кэлэр сылга субвенция бүттүүн сууммата 1 млрд солкуобайынан улаатан 8,884 млрд солкуобай буолуо.
Тыа хаһаайыстыбатын миниистирэ Артем Александров бары күүһү эти уонна үүтү астаан таһаарыыны тэрийиигэ холбуурга ыҥырда. Маны ситиһэргэ 6 бөдөҥ бырайыак пааспара оҥоһулунна уонна бигэргэннэ. Бу барыта Ил Дархан эт бородууксуйатын 8 тыһ. туоннаҕа, үүт бородууксуйатын 15 тыһ. туоннаҕа диэри элбэтэр уонна аграрнай үөрэх кыһаларын бүтэрээччилэри үлэнэн хааччыйар туһунан ыйааҕын толорууга туһуланар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
