Дьокуускайга тохсунньу 1 күнүттэн оптуобуһунан айан сыанатын 50 солкуобайга диэри үрдэтээри гыналлар. Ол тухары оптуобус сырыытын куһаҕаннык тэрийиини мөҕүттүү тохтообот.
Бу Андрей Косицкай салайааччылаах «СоюзАвто» тэрилтэ көҕүлээһинэ. Кини этэринэн, үрдэтии уматыкка, сапчааска ороскуот улааппытын, суоппардарга хамнас төлүүр уонна да атын кыһалҕалары кытта ситимнээх үһү.
Оттон Дьокуускайдааҕар төһө эмэ улахан иэннээх Иркутскай куоракка муниципальнай оптуобуһунан айан сыаната быйыл от ыйын 1 күнүттэн 25 солк. 30 солк. диэри үрдээбитин бэлиэтиибит. Онуоха диэри сэттэ сылы быһа үрдээбэккэ турбут. Арай, аҕыйах чааһынай маршрукка үрдэтэ сылдьыбыттар, ону даҕаны киэһэ 20.00 чаас кэннэ.
Мантан сиэттэрэн, биһиги быыкаа куораппытыгар оптуобус сырыытын кыайан сөпкө тэрийбэттэрин, сыанатын үрдэтэ туралларын киһи олус бэркиһиир. Иркутскайдартан туох итэҕэстээхпит эбитэ буолла...
Бэйэ кэр.
