Бүгүн, ахсынньы 11 күнүгэр, Бырабыыталыстыба 2-с нүөмэрдээх дьиэтин аактабай саалатыгар, «Саха Өрөспүүбүлүкэтин Суруйааччыларын сойууһа» Уочарата суох быыбардыыр сийиэһигэр кытта диэн, ыраахтан-чугастан элбэх суруйааччы муһунна.
Сийиэс өр кэмҥэ салалтата суох олорбут сойуус салалтатын талар соруктаах биллэриллибитэ. Бэбиэскэтигэр сойуус бэрэссэдээтэлин, Ситэриилээх сүбэтин, Ревизиялыыр хамыыһыйатын чилиэннэрин талыы, Устаапка көннөрүүлэри киллэрии, 2022 сыллаах чилиэҥҥэ ылыы боппуруоһун көрүү киирбиттэрэ.
Манна даҕатан, салалта боломуочуйатын сокуоннайа суохтук бэйэтигэр ылыммыт Владислав Доллонов, Устаабы кэһэн туран, бу сыл балаҕан ыйын 19 күнүгэр биллэрбит «сийиэһэ» табыллыбатаҕар сойуус чилиэннэрэ сийиэһи дьоһуннаахтык тэрийэр туһугар тоҕус киһилээх хамыыһыйаны талбыттарын санатабыт. Ити күнтэн хамыыһыйа, Устаабы тутуһан үлэлээн, бүгүҥҥү Уочарата суох быыбардыыр сийиэһи болдьообута уонна ыҥырбыта.
Ону баара, бүгүн Владислав Доллонов бутуйар үлэни ыыппытыттан, сийиэс үлэтэ саҕаламмакка да тохтотуллубут. Кини көмөлөһөөччүлэрин кытта сийиэһи бэйэтэ ыытаары туспа кворум таһаара сатаабыта сатамматах.
Оттон тэрийэр хамыыһыйа бэрэссэдээтэлэ Галина Фролова сийиэс тоҕо тохтообутун маннык быһаарда:
- Салалтата суох олорбут сойууска салалта талаары, 83 сойуус чилиэнин модьуйуутунан (требованиетынан) сийиэһи тэрийэр хамыыһыйа тэриллибитэ. Ол хамыыһыйа үлэлээн, сийиэс ыҥыран, регистрация, мандаат тэрийэн, болдьоммут кэмҥэ дьон мустубута. Онтон мөккүһэр өрүт иккис, хос регистрация, мандаат тэрийии ыытан, кворуму ситэ да аахтарбакка, сийиэһи саҕалаан барда. Микрофону саба тутуулаах, хамыыһыйа чилиэннэрин кытта балай эмэ мөккүһүүлээх балаһыанньаҕа биһиги сийиэһи салгыы тэрийэри тохтоторго күһэлиннибит.
Бэйэ кэр.
