Түөрт сыллааҕыта саха сүөһүтүн төбөнөн ахсаана – 2000 кэриҥэ, ол иһигэр ынаҕа – 830 эбит. Быйылгы ааҕыынан ити көрдөрүү 2583, ол иһигэр ынаҕа – 1119 буолбут. Үөрүүлээх сонуну Ил Дархан Айсен Николаев көҕүлээһининэн тэриллибит «Саха сүөһүтэ» тэрилтэ 5 сылыгар аналлаах тэрээһиҥҥэ иһитиннэрдилэр.
Сүөһү бүттүүн ахсааныттан 1275 төбөтө «Саха сүөһүтэ» тэрилтэҕэ иитиллэр. Манна 460 ынах, 486 мэгэдьэк сылгыта, 183 биэ киирэллэр. Маҥнай тэриллэригэр, 2019 сыллаахха, 525 эрэ төбө баара, ол иһигэр – 186 саха ынаҕа. Оччолорго, Ил Дархан Ыйааҕынан, сүтэр туруктаах саха сүөһүтүн 660-тан 1000 төбөҕө диэри элбэтэр сорук турбута.
« Бу соругу пуонда кэлэктиибэ улахан уонна кэтэх хаһаайыстыбалары, пиэрмэрдэри кытта тиһиктээхтик үлэлээн толордубут. Бу ураты туһалаах бэйэ этин уонна үүтүн элбэтиигэ эрэ буолбакка, төрүт үгэс, дьарык, олох-дьаһах харыстабылыгар уонна сайдыытыгар сүдү суолталаах. Онон, норуоккут иннигэр улахан үтүөлээх дьон буолаҕыт», - диэн эҕэрдэ тылыгар СӨ Бырабыыталыстыбатын бэрэссэдээтэлэ Сергей Местников эттэ. Маны сэргэ кини саха сүөһүтүн харыстабылыгар үлэлиир энтузиастары, учуонайдары, улуус баһылыктарын бэлиэтээтэ.
Александр Артемьев салайар тэрилтэтигэр, уопсастыбаннаһы кытта сибээс исписэлииһэ Екатерина Захароваҕа, бэтэринээр-саньытаар Алексей Варламовка туттардылар. Бырабыыталыстыба грамотатынан дириэктэри солбуйааччы Егор Посельскай, Махтал суругунан инженер, сүрүн исписэлиис Алексей Сазонов, сүрүннүүр исписэлиис Василий Потапов наҕараадаланнылар.
Үбүлүөйдээх тэрээһин чэрчитинэн Хоту сир тыйыс усулуобуйатыгар саха сүөһүтүн иитии уопутун сиһилиир «Якутский скот – достояние народа саха» кинигэ биһирэмин ыыттылар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
