РФ Төрүт сокуонун күнүгэр «Сэргэлээх уоттара» култуура киинигэр быйыл ыччат бэлиитикэтигэр ыытыллыбыт үлэни түмүктүүр «Лиидэрдэр көлүөнэлэрэ» үөрүүлээх тэрээһин буолла.
Манна СӨ Ыччат дьыалатыгар уонна социальнай коммуникацияҕа миниистирин э.т. Игорь Юргин, киин куорат баһылыга Евгений Григорьев, дьаһалта ыччат бэлиитикэтигэр управлениетын начальнига Андрей Михайлов, киин куорат дууматын ыччат бэлиитикэтигэр хамыыһыйатын бэрэссэдээтэлин солбуйааччы Алексей Семенов, дуума дьокутааттара, ыччат тэрилтэлэрин бэрэстэбиитэллэрэ уонна киин куорат ыччата кытыннылар. Ыччат бэлиитикэтин бастыҥ үлэһиттэрин бэлиэтээһин кэннэ туйгун, көхтөөх үөрэнээччилэргэ пааспардарын туттардылар уонна ычаат бэлиитикэтигэр бастыҥ көрдөрүүлээх ыччаты, түмсүүлэри биллэрдилэр.
«Сыл лиидэринэн» Дьокуускай куорат Дууматын иһинэн үлэлиир Ыччат Палаататын бэрэссэдээтэлэ Василий Иванов буолла.
«Сыл модун күүһэ» номинацияны уокуруктар уонна аттынааҕы бөһүөлэктэр ортолоругар Хатас нэһилиэгин ыччатын сүбэтэ ылла.
«Сыл дойдуһатынан» Бүтүн Арассыыйатааҕы Норуодунай Фронт ыччатын эрэгийиэннээҕи салаатын сүрүннээччи Тимофей Васев буолла.
«Кыайыыга дьулуһуу» номинацияны 29-с оскуола 9 кылааһын үөрэнээччитэ, 2-с ДЮСШ буулдьанан ытыы салаатын иитиллээччитэ Николай Яковлевка туттардылар.
«Инники кэм эрчимэ» номинацияны «Синергия» сыыппара колледжын устудьуоннарын сүбэтэ ылла.
«Сыл волонтерунан» М.К. Аммосов аатынан ХИФУ Психология институтун 1-кы кууруһун устудьуона Кира Алексеева буолла.
«Ыччат драйва» номинация «ZEMA – Саха сирин улуустарын ыччатын тэрилтэлэрин холбоһуга» уопсастыбаннай холбоһугар тигистэ.
«Сыл өрө тахсыыта» номинацияны Арассыыйа устудьуоннарын этэрээттэрэ уопсастыбаннай тэрилтэ Саха сиринээҕи салаатыгар анаатылар.
«Ыччат кута» номинация хаһаайынынан тэрээһиннэргэ анаан тэрил уларсар уонна атыылыыр «Dutkin» ааҕыныстыба салайааччыта Артур Дуткин буолла.
Сонун төрдө: Дьокуускай куорат уокуруктааҕы дьаһалтата
