Ахсынньы 25 күнүгэр “Байконур” космодромтан Саха өрөспүүбүлүкэтин уонна Бүлүү куоратын гиэрбэлэрэ ойуулаах “Союз 2.1б” аракыата куосумаска көтүөҕэ. Ити туһунан “Роскосмос” иһитиннэрэр.
Бүлүү улууһун баһылыга Сергей Винокуров кэпсээбитинэн, этиини “Роскосмока” Быйыл төрүттэммитэ 390 сылын бэлиэтээбит Бүлүү куоратын олохтоохторо бэйэлэ киллэрбиттэр.
“Роскосмос” судаарыстыбаннай корпорация этиибитин өйөөбүтүттэн үөрдүбүт. Итиниэхэ майгынныыр этиилэр дойду атын эрэгийиэннэриттэн уонна куораттарыттан эмиэ киирбиттэрэ эрээри, куонкурус түмүгүнэн Саха сирин уонна Бүлүү куоратын гиэрбэлэрин талбыттара”, – диэн баһылык быһаарар.
Кини этэринэн, “Роскосмос” Бүлүү улууһун кытта түһэрсибит сөбүлэһиитин чэрчитинэн, араас өрүттээх үлэни ыытар. Ол курдук, улуус саамай кырыы нэһилиэктэригэр – I Күүлэккэ уонна Үгүлээккэ – “Тыа сирин кэлим сайдыыта” судаарыстыбаннай бырагыраама чэрчитинэн оскуолалар тутуллубуттар. Кыттыгас үбүлээһин харчытыгар улуус өлүүтүн “Роскосмос” төлөөбүт. Онон, Бүлүү мөлтөх суоллаах-иистээх, ыраах сытар бөһүөлэктэригэр оҕо үөрэнэр, сайдар үтүө усулуобуйата тэриллибит, кэбиниэттэр бары аныгы тэрилинэн хааччыллыбыттар.
Итини таһынан, сөбүлэһии чэрчитинэн улуус социальнай-экэнэмиичэскэй сайдыытыгар, оскуолалары хааччыйыыга, араас тэрээһини үбүлүүргэ эмиэ үлэ-хамнас ыытылларын туһунан СӨ Ил Дарханын уонна бырабыыталыстыбатын пресс-сулууспата суруйар.
