Үлэлии сылдьан эчэйбит Саха сирин олохтоохторо, мэдиссиинэ өттүнэн көрдөрүүлээх буоллахтарына, анал массыынанан хааччыллар бырааптаахтар. Ону миэдиктии-социальнай эспэртиисэ быһаарар.
Ол быһыытынан РФ Социальнай пуондатын Саха сиринээҕи салаата үлэлии сылдьан эчэйбит биэс киһиэхэ саҥа LADA Granta массыынаны биэрдэ. Күлүүстэри управляющай Марина Герман туттарда.
«Массыыналар бары хаһаайыттарын уратытын учуоттаан оҥоһуллубуттар. Быйыл маннык массыынаны уон киһи ылла. Туттуллар болдьоҕо – 7 сыл. Ити кэм устатыгар пуонда салаата тырааныспар туттуллар ороскуотун толуйар. Манна уматык уонна өрөмүөн киирэр. Ол курдук, массыына хапытаалынай өрөмүөнүн ороскуотун сыанатын 30%-наах кээмэйинэн төлүүбүт», — диэн кини быһаарда.
Маннык өйөбүлү ылар кыһалҕалаахтар судаарыстыбаннай өҥө порталын нөҥүө эбэтэр СФР маннааҕы салаатын килийиэннэри кытта үлэлиир сулууспатыгар сайабылыанньа суруйуохтаахтар. Сиһилии 8-800-100-00-01 нүөмэргэ эрийэн ыйытыахтарын сөп.
Сонун төрдө: РФ Социальнай пуондатын Саха сиринээҕи салаата
